Erthyglau / Gwaith Celf

 

Dyma ganllaw byr i awduron erthyglau a nodiadau/adroddiadau byr. Cofiwch fod y darllenwyr yn amrywio, ac mae’n bosib nad ydynt yn gyfarwydd â’r iaith yr ydym ni’n gyfarwydd â hi yn ein meysydd gwaith ni. Osgowch jargon!

 

Y ffordd orau i ddod i adnabod arddull cylchgrawn yw drwy edrych ar hen rifynnau. Mae gan Natur Cymru ei lais arbennig ei hun. Ei bwrpas yw nid yn unig darparu gwybodaeth awdurdodol, ddiweddar am rywogaethau a chynefinoedd a’u rheolaeth, adrodd ar waith arloesol a’r darganfyddiadau diweddaraf; mae hefyd yn gwneud y cysylltiadau rhwng y straeon amgylcheddol hyn a’r agenda cymdeithasol ac amgylcheddol ehangach, a’u cyflwyno mewn ffordd ddiddorol a darllenadwy.

 

1. Manylion personol

Byddwch cystal â’r rhoi’ch enw, eich teitl, a sut hoffech gael eich disgrifio. Dylai awduron prif erthyglau gyfyngu hyn i bymtheg gair ee teitl swydd a bywgraffiad byr neu ddiddordebau. Ar gyfer erthyglau/adroddiadau byrion, bydd teitl eich swydd yn ddigon.

Cofiwch gynnwys eich rhif ffôn neu gyfeiriad e-bost fel y gallwn gysylltu â chi ar frys os oes angen.

 

2. Teitlau a phenawdau

Ceisiwch gael teitlau sy’n ennyn diddordeb, yn hytrach na cheisio crynhoi erthygl gyfan yn y teitl: deg gair ar y mwyaf. Os ydych angen mwy o le, gallwch roi is-deitl. Yr un mor werthfawr yw paragraff eglurhaol byr yn gosod y cyd-destun, gallwch italeiddio hwn fel cyflwyniad i’ch erthygl.

 

Byddai o ddefnydd pe baech yn ystyried torri’r testun drwy ddefnyddio is-benawdau bob hyn a hyn, darparu dyfyniadau y gellir eu defnyddio yn yr ymylon, defnyddio pwyntiau bwled neu dablau o wybodaeth. Nid yw hyn yn hanfodol, ond byddwch yn barod i weld is-benawdau yn eich testun!

 

3. Prif lythrennau, acronymau ac atalnodi

Fel arfer dylai llythyren gyntaf enwau cyffredin planhigion ac anifeiliaid fod mewn llythrennau is (ee ystlum trwyn pedol, ond ystlum Daubenton). Dim ond lle mae eu hangen y dylid defnyddio priflythrennau. Os ydynt yn ffurfio acronym rydych yn cyfeirio ato wedyn, rhowch yr acronym mewn cromfachau ar ôl y geiriau llawn. Os oes gormod o acronymau, efallai y byddaf yn cyflwyno cwota, neu’n eu difa’n llwyr!

 

Mae croeso i bob ffurf ar atalnodi, yn enwedig atalnod llawn. Os oes gennych frawddeg sy’n hirach na 30 gair, meddyliwch o ddifri am ei haneru.

 

4. Y defnydd o enwau gwyddonol

Mae yna sawl dewis yma. Fel arfer mae’r enw gwyddonol mewn italig (heb gromfachau) yn dilyn y defnydd cyntaf o’r enw cyffredin, ond nid oes angen ei ailadrodd. Os nad oes amheuaeth ynghylch y rhywogaeth y mae’r enw cyffredin yn cyfeirio ato (ee llwynog), gallwch hepgor yr enw gwyddonol. Cewch chi ddewis. Os nad oes enw cyffredin, bydd yr enw gwyddonol yn sefyll ar ei ben ei hun.

 

5. Fformatio

PEIDIWCH â defnyddio unrhyw fformatio arbenigol, fel troednodiadau, a all achosi cur pen i ni. Mae’r cylchgrawn yn cael ei lunio gyda meddalwedd arbenigol a bydd unrhyw fformatio a rowch chi mewn dogfen Word yn gorfod cael ei ddadwneud gennym ni. Yr eithriad yw defnyddio italig i enwau Lladin. Os ydych angen defnyddio troednodiadau, gwnewch hynny drwy roi’r rhif mewn cromfachau yn y testun, ee (1).

 

6. Hyd a lluniau

Mae’r prif erthyglau tua 1500 o eiriau: “erthyglau rheolaidd” un dudalen yn 6-700 gair, ac adolygiadau llyfrau 3-500 gair. Os oes gennych bwnc da ac angen mwy o le, mae croeso i chi gymryd mwy, hyd at tua 2,500 gair. Mae hyd yn llawer llai pwysig na safon - bydd erthygl wirioneddol dda yn dal sylw’r darllenwyr p’un ai ei bod yn hir neu’n fyr.

 

Ystyriwch luniau a darperwch awgrymiadau, neu’n well fyth, anfonwch luniau gyda’ch erthygl. Gall y rhain fod yn ddelweddau digidol, sleidiau neu brintiau i’w sganio yma. Mae croeso i dablau, graffiau, mapiau a logos, lle’n briodol. Gwnewch yn siŵr bod gennych ganiatâd hawlfraint llawn i atgynhyrchu unrhyw luniau.

 

Rhaid i bob llun digidol gael ei anfon fel ffeil ar wahân (jpegs, tifs ayb). NI ALLWN DDEFNYDDIO DELWEDDAU SYDD WEDI EU MEWNOSOD MEWN DOGFEN WORD. Gallwn ddefnyddio tablau syml iawn yn Word, ond dylai unrhyw beth mwy cymhleth gael ei anfon ar wahân. Mae’n rhaid i’r lluniau fod ag eglurder cyn uched ag y bo modd.

 

7. Anfon eich erthygl

Gellir anfon erthyglau ar ddisg neu drwy e-bost. Rydym yn defnyddio MS Word for Windows, ond mae’r rhan fwyaf o raglenni yn gydnaws, a gallwch anfon mewn fformat text-only. Gall ein system e-bost ymdopi â delweddau hyd at 10Mb, a gallwn dderbyn ffeiliau WINZIP. Gallwch anfon testun drwy’r post hefyd, yn y ffurf sydd fwyaf cyfleus i chi, ac mae erthyglau mewn llawysgrifen gain bob amser yn bleser i’w derbyn!

 

GWAITH CELF

Rydym bob amser yn chwilio am waith celf cyfoes i’w gynnwys ar ein cloriau, neu ddarluniau o’r radd flaenaf neu gartwnau i’w cynnwys y tu mewn i’r cylchgronau. Rhaid i’r cloriau fod yn lliwgar a thrawiadol - pam nad edrychwch chi ar rai o rifynnau’r gorffennol.

Yn ol i'r brig